【Now財經台】港股過去兩年跌唔停，似乎冇人再提及月供投資法，因為投資者擔心愈供愈跌，究竟市況差嘅時候，暫停月供股票係咪好嘅做法？港股已自舊年10月低位反彈咗唔少，依家仲係咪入市嘅好時機？
安泓投資總監兼香港大學房地產及建設系客席副教授楊書健指，市況愈令人憂慮，就愈要做月供，若由2007年底起，每月投資10000元落房託，例如領展房產基金(00823)，至今回報達3.6倍，如果將股息投資埋落去更達4.75倍。
佢又指，即使遇上金融危機，但每月一筆固定金額所買到嘅股數會多咗，當市況回穩，喺最低位買入嘅股份，回報反而最高，而愈早開始月供，滾存嘅股數愈多、效益愈大，所以唔需要擔心依家係咩市況。
Victor又話，除月供房託外，公用、地產股等都係合適選擇，只要公司規模夠大，長遠嚟睇競爭能力變化唔大。
