【輪證贏家】大裂口已補

【now.com財經】最後一個連周末嘅假期都放完啦，數數月曆返埋呢個四日工作天之後，就要迎接連續七個星期都無紅日嘅生活，今年屈原咁啱爬咗去星期六嗰日，變相下一次有得放紅日就係七一嘅時候。

差不多完U，見成個版面都著綠燈就估到今日個市都應該開高；最養眼係隻SPDR金ETF(02840)，不過喺作戰室裡面之前係叫大家直接買實金，因為金係做長線部署用。

恒指今早開升71點，報22,576點。及至開市後上上落落Chok過海盜船，到依家9點50分，我老媽上嚟探肥貓時，恒指喺五分鐘圖行咗個「三角形」出嚟。

數下個牛熊證街貨圖，依家10點9分，指數已經上到22,600點樓上，所以第一層熊證街貨22,500至22,599點全數已經被收回，向上再掃見重貨區23,000至23,099點都儲到上過千張期指街貨。如果用返一貫順街貨方向去打嘅話，好倉比得過。

再望望鐘，送走我老媽嘅時間大約係10點20分，恒指暫時日內高位見過22,643點，已經補咗4月7日跌3,000點嘅大裂口位；只不過見依家小時圖Slow STC(14.3)兩線上到超買位，保歷加底線又有似向上，即使指數再上行都似乎要條Slow STC(14.3)鬆一鬆先至可以。

理論上，預計指數同Slow STC(14.3)向下回落係應該執隻淡倉出嚟；不過10次有7次出完文之後個市都變咗樣，搞到原先係文度定出嚟嘅策略已經過晒。

所以，跳多一步揀定隻恒指牛(68482)，收回價21997點，同現價有約600點距離，槓桿有約32.3倍，就係等指數向下落完之後，借到平均線又好，Slow STC(14.3)落到超賣位之後先至出，當行一趟Swing Trade都好，總之唔係一出完文睇完之後又無咗件事咁先啦。

作者阿珊，以技術分析專心玩輪證，唔貪心，努力賺取我家肥貓罐罐。

直接去Patreon七日免費試用即市作戰教室://www.patreon.com/join/cbbcwar

資訊只適用於合資格的香港投資者。結構性產品由瑞銀發行，瑞銀證券為流通量提供者，可能是唯一報價者或巿場參與者。結構性產品價格可急升或急跌，投資者可能會蒙受全盤損失。過往表現並不反映將來表現。投資前應瞭解有關風險，並諮詢專業顧問及查閱有關上市文件。