【股市脈搏】大股東再減磅 經緯天地曾飆逾倍

【Now財經台】從事電訊相關業務嘅經緯天地(02477)，股價今日(7日)逆市爆升，今朝輕微高開後，愈升愈有，最多升逾1倍，高見13.22元，收市報12.26元，仍升逾87%，成交股數較過去100日同時段平均增3倍，成交金額近1.8億元。

經緯天地喺2024年1月12日上市，下周就上市滿1年，集團喺昨日(7日)收市後公布，主席賈正屹將減持公司股份，預期2025年1月17日完成，即禁售期完結後，持股量將由51%降至約31%，但仍然係控股股東。

其實今次唔係大股東首次沽貨，喺公司上市半年後，亦曾經大手減持，雖然公司通告話賈正屹對公司前景好有信心，但上市1年內兩度大手減持套現，唔排除會再沽貨，未來都要繼續留意股權變動。