【財經TOP SEARCH】美團前景問號多撈唔過

【Now財經台】截至早上11時止，1小時內《彭博》用戶關注度上升最多港股，依次為美團(03690)，騰訊控股(00700)，比亞迪股份(01211)，新澳能源(02688)及碧桂園(02007)。

美團季績好過預期，放榜後獲部分券商上調目標價，但股價今朝一度重挫逾7%，暫時連跌第3個交易日。麥格理指，消費復甦推動美團首季業務表現強勁，對公司前景看法正面，但對到店業務盈利能力有憂慮。美團股價績後插水到底係咩原因？

富昌證券聯席董事譚朗蔚指，正如部分大行對美團盈利前景持懷疑態度，擔心增長無以為繼，加上港股市底較差。Stevan認爲，美團到店業務及餐飲業務都屬於內需，內地上月唔少經濟數據都曳，而餐飲板塊亦做得差，一來市況唔好，二來內需股未必靠得住，所以股價就碌咗落去。

佢又提醒，切勿抱「今日跌錯咗」嘅諗法，無論京東集團(09618)還是美團，依家都係好弱勢，唔好亂咁撈底。