我的股票

    名稱 現價 升跌

    資料報價延遲十五分鐘

    【盤房來料】唔追教育股睇返通關概念同程藝龍

    【醫療保健業】 信報財經新聞 2021/11/25 14:22

    【信報財經新聞】美股隔晚先跌後回升,道指早段跌逾200點後,最終僅跌9點,而標指跟納指則分別升10點及70點。至於港股今早曾隨內地股市走軟,曾跌至兩周低位,但其後喺重磅科技股最後之下,倒升,反映大市喺24500水平有不俗支持。
    恒指高開14點後,隨內地股市回軟,一度跌152點,見24532點半日低位,跌至兩星期低位,其後於24500水平有支持,喘定後中午收市前倒升最多44點,見24730點半日高位。中午恒指報收24714,升29點;國指跌2點,報收8792;恒科指半日升41點,報收6333。

    隔晚美國10年期債息略見回落,暫緩利率趨升壓力,金融股升幅受到限制,大笨象(00005)半日跌0.5%,不過友邦(01299)則靠穩,半日仍微升0.1%,而內銀跟內險股則個別發展。前日阿Man喺收費聊天室講咗100元邊嘅藥明生物(02269)可以撈返啲短炒,今日 中午升至105.7元,半日升1.6%,兩個日輕輕鬆穩賺5%,暫時107元10日及20日線滙聚區有阻力,要突破此關方能重上110元。今日輪到比亞迪(01211)出現撈貨機會,半日低見301元,300水平料有支持,而下一個支持位喺280元,現價又可以撈一撈貨短炒,短線阻力320元,升破自然新高在望。

    科網股仍然係市場焦點,以為騰訊(00700)要配合合規檢測,今日股價將受壓,不過接近470元支持位又有買盤低吸,半日全倒升1.9%。至於美團(03690)明日業績前有啲腳軟,不過265元支持不俗,只要業績市場受落,股價要重上280元唔太難,下面支持位265元守到無有怕。至於弱勢阿里(09988),噚日再創上市新低後,130元水平漸見支持,有機會連同上次低位132元做咗個雙底,只係要博上去就蟹貨重重,首個阻力位係前支持位140元,失守支持變阻力呢啲慘況經常發生。而小米(01810)派完成績表,未能帶畀市場驚喜,股價噚日失守廿皮重要支持,今日略見反彈,半日彈近2%,先唔好講咁多,短期唔重上廿皮企穩都濕滯。

    呢兩日除咗藥明生物可以撈貨之外,阿Man亦建議睇返啲濠賭股,阿Man心水就梗係龍頭銀娛(00027),48元邊叫收集,今日上到50元附近,雖然唔算升得多,半日升2.3%,但就補返晒9月中所遺下嘅下跌裂口,上返50元企穩,下一目標當然係望住55元,仲有一成水位喺上面。其他濠賭股分別升逾2%至5%不等,多得瑞銀嘅報告,將整個板塊評級上調。

    教育股規管明朗化,呢近教育股落鑊,今日又係思考樂(01769)升得最勁,半日升28.7%,其他教育股升幅由3.5%至超過一成不等。不過阿Man就唔追貨,寧願做花生友,反而搵返隻有通關概念嘅同程藝龍(00780)做目標,呢啲價上車,博升穿埋條50日線企18元,上面目標可以睇高一線去19至20元,下面穿16.8止蝕,都有一定值博率。

    麥狄文
    (徐狄怡‧證監會持牌人)

    想睇更多財經消息