我的股票

    名稱 現價 升跌

    資料報價延遲十五分鐘

    【盤房來料】唔高追出行資源股 寧低撈優質科技股

    【資訊科技業】 信報財經新聞 2021/02/23 14:04

    【信報財經新聞】美股隔晚個別發展,納指跌勢較為顯著,創下去年10月底以嚟最大單日跌幅;而標指則五連跌,係舊年2月以嚟最長跌浪;只有道指轉跌為升,反映資金轉投傳統股懷抱。恒指今早隨美股低開,穿一穿10日線(30316)即反彈回升。恒指低開129點報30189,曾跌193點,低見30126半日低位,跌穿10天線後掉頭急升,最多升456點,見30776半日高位。恒指中午升449點,報收30769點;國指則報收11952點,升58點;但恒科指早段則再跌逾3%,見9637點半日低位後跌幅收窄,中午報收9919點,跌58點。

    大笨象(00005)今日派成績表,上半場跟友邦(01299)成為升市火車頭,為恒指貢獻169升幅,兩股齊升3%,但中午大笨象派成績表,去年列賬基準稅前盈利跌34%,派息15美仙;睇嚟呢幾日升幅已反映晒業績同派息因素,下半場可能有獲利盤出現,總之記住50元嘅阻力唔易過,有貨自己執生啦……至於小米(01810)今日表現令唔少米粉唔多happy,半日跌近3%,係表現最差嘅藍籌股。睇嚟小米仲有一段時間要行range,28至32之間,除非有重大利好消息刺激,否則米粉呢期炒住波幅先。其他科技股個別發展,今日邊啲彈得勁,好似好醫生(01833)就反映咗市場資金嘅喜惡,暫時都係大隻重磅嘅較受歡迎,次一線嘅科技股暫時得個守字。

    旅遊出行股今日有資金追捧,特首高官一場疫苗show,令市場憧憬疫苗接種後可安安心心出行又出門,濠賭股今日升勢較為顯著,閒閒地升7%以上,龍頭銀娛(00027)最勁,半日升11.2%。航空股亦有資金追捧,升幅由5.3%至一成不等,但真心家下都未曾通關,內地航空股可能仲好少少,但要全球通關都條要觀察一段時間,不過股票炒預期,依家落鑊先炒亦有道理。

    資源股繼續吸金,阿Man就繼續食花生,老老實實,雖然有大行叫睇返呢堆資源股,但荒謬嘅係資源股呢兩日急升後,股價已遠遠拋離大行已調高嘅目標價,仲要唔係高出三幾個%,咁搞法現價點追得落手,阿Man就打死唔高追,但永遠唔會阻人發達,有意入場自己衡量風險。與其高追資源或出行股,阿Man寧願吼位撈優質科技股更為划算。

     

    想睇更多財經消息