【Now財經台】三生製藥(01530)昨日(20日)日公布，同輝瑞(Pfizer)簽獨家許可權，而輝瑞有機會入股三生製藥，刺激三生製藥股價急升。個別藥股有正面消息利好整個板塊投資氣氛，內地藥企有一定水平，又有成本優勢，連外資都睇中，內地醫藥業前景係咪可以繼續睇好？
勝利證券首席顧問陳建良認為，內地人口老化問題令醫藥需求增加，而人工智能(AI)協助開發新藥，逐漸取代進口藥物，因此，內地醫藥股長遠前景值得睇好。佢又指，現時唔少國家都傾向購買較平嘅內地藥物，令內地藥企攞到更多出口生意。
不過，KL認為，內地生物製藥股或創新藥股嘅portfolio唔及外國公司，而內地藥企又要持續面對內捲問題，令投資者會較難預測藥股走勢。佢提醒，對藥股有興趣嘅投資者宜打散嚟買，佢相信未來整體藥股嘅市值膨脹機會仍然好高。
