【Now財經台】港產「藥妝王」龍豐集團(02290)今日(6日)首掛，相信表現令唔少捧場客失望，開市報4.32元，較招股價5.18元，低逾16%，之後愈跌愈多，尾市一度低見2.8元，較招股價低近46%，估計同公開發售反應唔算熱烈，加上連鎖藥妝百貨業務性質冇稀缺性，兼今次上市冇引入基石投資者有關，點評估龍豐上市後走勢？
Blue Water Capital投資總監李澤銘指，本地零售或餐飲相關股大部分只係喺上市嗰日短炒一轉，之後就好快「潛水」，不過，龍豐今日「潛水」幅度較預期大。佢又話，集團招股規模都算大，集資最多約8億元，但相比一啲僅集資幾千萬元至1億元以下嘅小型公司，股價係較難被掃高，加上冇基石投資者，相信願意炒作嘅投資者都較少。
Alan續指，如果第1日都炒唔起，上市後再炒起嘅機會就更微，建議抽中嘅投資者搵定個止蝕位。
