【Now財經台】紫金礦業(02899)股價今日(4日)高開逾3%後，升幅一度擴大至逾4%，高見34.24元，股價暫時已連升4日，加上有大行「祝福」，追CALL嘅投資者，擺位時多唔多參考前高位，即36.92元水平？
中信證券國際股權衍生品銷售經理李碧珊指，今日資源股表現突出，相信同美國減息預期升溫，以及期銅價格創新高有關，令有金價又有銅價概念嘅紫金多咗投資者關注。雖然紫金走勢比恒生指數強，股價更企喺多條移動平均線之上，但仍落後於其他資源股。
Percy又話，睇返技術走勢，紫金11月曾觸及34元水平嘅頂位，如果可以突破呢個位，下個阻力睇前高位，即36.92元水平，投資者可以參考今朝最受歡迎嘅CALL，行使價38元至39元，明年3月到期，槓桿約6倍。
