【Now財經台】截至早上11時止，1小時內《彭博》用戶關注度上升最多港股，依次為金山軟件(03888)、萬科企業(02202)、騰訊控股(00700)、小米集團(01810)、友邦保險(01299)。
金山軟件今日(13日)半日逆市升10%，雷軍身兼金山軟件及小米董事長，兩家公司分別有一單利好同負面消息。商務部上周四(9日)宣布加強稀土等關鍵材料嘅出口管制，據報附件已轉用國產金山軟件開發嘅「WPS」格式，而非以往由美國企業開發嘅「PDF」或「DOC」格式，市場反應似乎相當熱烈。小米方面，據報上周四(9日)凌晨，福建省福州市平潭縣一輛小米SU7電動車失事墮海，司機不幸喪生，小米微博至今未就事件回應，點睇呢兩單消息？
富昌證券聯席董事譚朗蔚指，內地國產自強已經進行咗幾年，今次單純替換文件格式，其實並唔值得炒作，如果股份受惠長線政策方向等，走勢都唔會太差，反而要留意業績基本面等，先係影響股價嘅較大原因，有貨嘅不妨先繼續揸住，守住約33元位置，始終股份過往一直較弱勢，單靠今日嘅消息，唔足以令其突然成為值得投資嘅股份。
至於小米，Stevan就話，事件令市場開始對小米智能車系統有疑慮，但科技股本來近期就跌得較深，因此消息唔完全係今日股價挫嘅原因，但留意股份喺約54元橫行區間累積唔少重倉，上日(10日)已經跌穿，暫時買入風險高，唔太建議入手，而有貨嘅投資者亦唔建議溝貨。
