【now.com財經】思捷環球(ESPRIT)(00330)喺2020年閂咗亞洲56家分店，當中包括香港，近日突然喺IG、Facebook及Threads出現「esprithongkong」嘅新accout，其中喺IG出咗一個post，寫上「SEE YOU IN NOV」，惹嚟唔少揣測。此外，有網民「爆料」，指撤出香港好多年嘅ESPRIT將會「回歸」，仲揀咗喺銅鑼灣開舖。
ESPRIT喺1993年12月喺香港上市，更一度成為「藍籌股王」，股價喺2007年升上133元嘅頂峰，當時市值逾1700億元，但之後因為零售業陷入困境，集團業績不斷「見紅」，股價亦一直向下，另一個「致命傷」係當時邢姓大股東，喺集團股價不斷破頂時，20度減持套現逾200億元，呢啲舉動亦送咗股價一程。
到咗2008年，一場世紀金融海嘯席捲環球金融市場，令ESPRIT業績及股價神話徹底破滅，而集團嘅衰落亦同時代及時裝世界嘅變遷有關，網購崛起及面對Fast Fashion等挑戰，例如來自西班牙嘅Zara、瑞典嘅H&M，以及日本嘅Uniqlo和GU等，款式夠快夠新之餘，售價亦比ESPRIT平一截，成功搶走唔少生意及消費者，雖然集團多次進行重組及換管理層，但仍然翻唔到身。
ESPRIT今次「回歸」，呢場翻身戰仍然唔易打，因為本港零售業正面消費疲弱、經濟前景唔明朗、本地消費者及旅客消費模式轉變、內地網購等因素夾擊，處於一個捱打困局，集團點樣先可以站穩腳，甚至逐步重建時裝王國，仍然係一個好大考驗。
思捷股價今日(18日)向下，最新報1.45元，跌不足1%，最新市值僅逾4億元。
