【Now財經台】A股早前氣勢如虹，上證綜合指數喺8月升上10年高位，近期市場討論A股會否重演2014至2015年來得快去得快嘅牛市，繼而出現泡沫。據《彭博》最新報道，內地或出手遏制A股投機炒作，希望A股可以平穩發展。依家A股似乎冇當年咁癲，但受消息影響，包括上證在內多個主要指數今日顯著受壓，係咪投資者擔心會歷史重演？
蓮華資產管理首席投資官兼管理合夥人洪灝指，中證監主席上周五(8月29日)喺北京舉辦咗一場以「鞏固資本市場回穩向好勢頭」為主題嘅會議，更曾呼籲加大市場開放，吸引外資進入中國市場等措施，因此，佢認為呢單傳聞可信度好低。佢又指，中證監一向傾向保護投資者利益，去年嘅「924行情」除咗掀起一波強勁行情令A股大升外，亦反映官方為保護市場會作出相應對策。
洪灝又認為，如果依家A股嘅熱度遠不及去年9月瘋狂，中央根本唔會出手遏制投機嘅情況，又指傳聞屬空穴來風，因此，投資者唔需要自亂陣腳。
