【Now財經台】恒生指數今個星期一度迫近26000關，再衝上4年高位，但美團(03690)交出一份令市場驚嚇嘅業績後，拖累恒指掉頭向下，冠域商業及經濟研究中心主任關焯照早前將恒指目標定喺26500點，依家需唔需要調整？
關焯照指，港股受惠於A股強勢，4月至今A股升幅相當理想，過去1年，上證綜合指數累升約35%，恒指更累升約40%。佢又話，內地股市造好，加上資金持續流入及減息，理論上港股仍然有運行，雖然美團業績差過預期令市場大失信心，但美團喺恒指嘅比重只佔約4%，所以影響唔大。
關博士又相信，滙豐控股(00005)、中國移動(00941)能夠向上，友邦保險(01299)有維穩動作，如果內銀出完業績後可以企穩，恒指未來幾個月有機會向上，因此，26500點呢個目標年底前仍有機會達到。
