【Now財經台】從事物管業務嘅華潤萬象生活(01209)今日(27日)中午派咗中期成績表，上半年多賺逾7%，收入按年增長逾6%，除咗中期息，更派發特別息。按業務劃分，商業航道業務收入按年增長約15%，毛利率升至66.1%，物業航道業務收入按年僅增長1%，毛利率更微跌。不過，集團股價午後一度急挫逾9%。點睇華潤萬象呢份業績？
南華金融集團副總裁莫灝楠指，商業物業方面，華潤萬象係比其他同業做得好，萬象城、萬象中心等喺一線城市嘅出租率都非常高，人流管理都唔錯，反映過往集團規劃商業物業做得非常好。
物業航道方面，Casper續指，雖然收入有增長，但因為人工等開支不斷增加，最終拖累毛利率。此外，亦唔排除係受「內捲」影響，因為第3方提供物管服務通常都係以價格取勝，但物管唔係高技術含量嘅行業，加價空間唔多，所以毛利率就會受制喺低位。
