【Now財經台】生物科技股今日(8日)普遍回調，其中，再鼎醫藥(09688)昨日(7日)出完業績後，股價今日(8日)一度重挫11%，雖然上季收入按年增長9%，經營虧亦按年收窄28%，但核心產品「則樂」上季收入淨額按年倒退8%，係咪今日股價急挫嘅「死因」？
紅蟻資本投資總監李澤銘認為，生科企業嘅投資邏輯出現變化，愈來愈多藥企對外授權交易，市場對內地藥企嘅創新及研發能力改觀，令估值大幅提升，唔少創新藥企嘅股價今年錄得倍數升幅，但升幅遠超潛在利潤增長，之前生科板塊投資氣氛高漲，投資者唔會退場，但依家業績同市場預期有落差，加上板塊本身有調整壓力，令股價調整更明顯。
Alan又指，見到內地創新藥價格向上，近兩次醫保談判及集體採購壓價情況都唔算嚴重，市場期望藥企上半年收入會錄得顯著增長，但實際上公司業績未有突破，難以支持股價今年嘅升幅，導致大幅調整。
