【Now財經台】IMAX CHINA(01970)昨日(24日)出咗中期業績，股價今朝(25日)高開逾6%後，升幅一度擴大至7.7%，高見9.04元。IMAX收入按年增長31%，純利更按年飆88%，回顧內地上半年整體票房約292億人仔，按年增長約23%，IMAX股價今日落鑊，係咪同呢份中期成績表有關？
紅蟻資本投資總監李澤銘指，呢份業績市場都收貨，所以股價今日有得升，但其實市場對IMAX後續發展都冇乜信心，內地上半年票房分布極唔平均，有逾半來自年初上映嘅《哪吒2》，而3月開始整體票房表現慘淡，雖然暑假有重磅戲上映，但唔係好帶得起整體票房，所以下半年票房表現會唔會再有驚喜成疑。
Alan又話，除咗票房收入，亦可以留意會唔會有更多投資方及院線建設新IMAX影廳，呢方面喺疫後都出現咗一個增長趨勢，不過，由於內地依家整體消費疲弱，睇返上半年票房，再加上成本問題，會唔會再有人投資新IMAX影廳都係一個問號。
