【Now財經台】西藏水資源(01115)股價今早(21日)高開10%後，升幅好快擴大至55%，一度高見0.62元，升上3年高位，成交股數較過去100日平均大增12倍，暫時成交金額逾3000萬元。
今日成個板塊都畀西藏超大型水利工程開工消息炒起，包括西藏水資源，但值得留意係，西藏水資源其實唔關水利工程事，公司主業係賣礦泉水，亦有啤酒業務，但近兩年不斷發盈警，加上消費市道下滑，呢兩年都要作大額資產減值。
睇返技術走勢，西藏水資源股價過去1個星期開始異動，由逾0.2元炒到上周五(18日)嘅0.4元，相對強弱指數(RSI)已升至83嘅逾4年極超買水平，除非資產減值問題有大改善，否則，都要諗清楚係咪值得繼續追炒。
