【now.com財經】基於屋企都只係得兩人一貓嘅關係,周末同我家老爺望望月曆,原來得返兩個零三個星期就到農曆新年,於是開始逐步大掃除:每個周末抹屋企嘅一個範圍,咁喺新年之前就會清潔得晒成間屋而唔駛一次過做抹死人。
今朝恒指就選擇一次過清晒啲牛證,指數今朝開市先跌140幾點之後,搭正9點半就向下係咁殺落去,殺咗16分之後低位見18,671點低位,將首四層牛證街貨全掃收回,呢四層夾埋有相當於4,074張期指街貨。而作戰室嘅戰友都已經食飽飽;甚至有戰友見指數今日穿19,000點再向下嘅,沽走借週線圖上年10月開出嘅淡倉,肥到隻貓貓要開高級肉乾同罐罐。
望望鐘依家10點13分,坦白講指數向下落咗咁多,又食咗成4,000幾張期指街貨飽到咁,再出淡倉好似肉唔多咁。但事實又指數依家擺位繼續踩住牛證嘅同時,同熊證又咁鬼遠,唔向下追落咁仲有咩好做?
有,因為喺五分鐘圖畫到一個100嘅區間位出嚟。揀咗貨先,恒指熊(66439),收回價19,138點,同現價有約370點只係作Day Trade用;恒指牛(51003),收回價18,450點,同現價有約316點距離仲貼。
牛熊各一揀晒出嚟,好明顯依家指數行緊區間位啦,10分鐘前仲橫到一個「長方形」,但10分鐘即係依家10點21分,開始變「平底行角形」,原先諗住「長方形」的話,咁策略上頂底來回出Swing牛熊咁炒嘅,但「平底行角形」的話,就比少少時間等睇指數過邊一條線之後再出單方向而順方向出倉,反正我出文你睇文都要時間,我諗你睇到呢度都已經有答案。
作者阿珊,以技術分析專心玩輪證,唔貪心,努力賺取我家肥貓罐罐。
Patreon作戰教室七日免費體驗:https://www.patreon.com/join/cbbcwar
資訊只適用於合資格的香港投資者。結構性產品由瑞銀發行,瑞銀證券為流通量提供者,可能是唯一報價者或巿場參與者。結構性產品價格可急升或急跌,投資者可能會蒙受全盤損失。過往表現並不反映將來表現。投資前應瞭解有關風險,並諮詢專業顧問及查閱有關上市文件。