【Now財經台】檳傑科達(01665)計劃以溢價25%私有化公司,停牌約兩周後,今日(20日)復牌,高開逾13%後,升幅一度擴大至逾17%,高見0.94元,暫時成交額逾1000萬元,成交股數係過去100日同時段約15倍。
檳傑科達6年前由喺馬來西亞上市嘅母公司Pentamaster分拆來港上市,股價表現一直平平無其,交投亦長期淡靜,所以決定私有化公司,除每股0.93元外,亦會派特別息0.07元,加埋就是1元,同上市價一樣,較停牌前有25%溢價,亦較截至9月底止每股資產淨值(NAV)有近40%溢價,又講明唔會再加價,成功私有化後就會除牌。目前,大股東持股量逾63%,涉及嘅私有化代價約8億元,後市要留意私有化係咪可以順利過關。