【Now財經台】科指成分股中，今日(18日)以新能源車股跌幅較顯著，暫時以小鵬汽車(09868)、蔚來(09866)表現最差，股價一度挫近6%及逾5%。最近新能源車企消息好壞參半，三中全會暫時仍未有特別消息。此外，Tesla今年4月已經喺內地開始加價，包括國產model Y，但市場認為減埋呢轉，減價戰會暫時「停火」，喺唔同因素影響下，車股後市會點行？
艾德金融執行董事陳政深指，車股暫時未有轉勢跡象，過去幾年，中央推出唔少國策扶持新能源車產業，由於造車牽涉大量供應鏈，係可以帶動經濟。佢又話，由於內地嘅引擎技術唔及外國，所以大部分內地車廠會專注造純電動車，而地方政府亦非常鼓勵發牌畀電動車。
Ryan續指，直至近一兩年，市場開始出現飽和情況，購買力轉弱，內地車廠紛紛開拓國際市場，現時全球最大汽車市場包括美國、歐洲等，但美國唔歡迎外來車，一旦歐洲對內地車企「落閘」，呢啲公司就會面對好大挑戰，可能拓展東南亞等新市場，但由於呢啲地方嘅基建相對較差，會令新能源車市場發展放減。
