【now.com財經】前日臨收市以平均買入價0.179元小注執隻恒指Put(12586)過夜，本以為指數會再來多次低開低走，不過，指數噚日回升，雖然升幅唔係話好勁，波幅仍然都係比較低，但嚴守策略下喺朝早見五分鐘圖上破咗「三角形」之後，(12586)亦無得留低。
壯士又未至於斷臂嘅，事關呢一注本來都唔係好大注，不過，喺噚日下半場見指數幾乎全個半場下行，最終升幅以收窄至18點，報17,213點收市，將噚日所有嘅升幅即日塵歸塵、土歸土，如果堅守隻(12586)去到最後收市的話，以輪價0.175元計，平均輸少4.5格(〒︿〒)
當然，呢啲都係馬後炮啫，有早知真係唔會有乞衣；不過落得場就自然要Bear risk。而比較eye catching嘅，應該都係噚日嘅成交額，的確有諗過噚日會唔會連500億都無，但阿媽話做人唔好太mean，所以起題出600億算，到最後出嚟嘅答案係470億，天呀！你知唔知早些年份啲半日市(12月24日同31日嗰啲節日氣氛濃罩住嘅時侯)，半日成交都有300億，比埋個下畫你都只係得470億，情何以堪。
電視做緊亞運羽毛球混雙準決賽，恒指亦完咗U盤，久違了三位數見綠燈嘅開市，先開升155點，報17,370點，喺作戰室一早量度定指數上方嘅線位，大多數都係17,5XX點，所以大家都準備定好倉應市。及至開市之後，恒指即時飆高， 至依家9點40分最高見過17,518點，第一關Set好咗喺小時圖嘅50線(約17,501點)，而第二關則為日線圖上10線(約17,516點)，呢兩關都順利達標，戰友們亦快來快去的完成第一注。
坦白講大家見到指數稍過到10天線後甩走好上嘅好倉真係非常合理，唔係對個市無信心，一彈即沽，而係根本個市比唔到信心我哋，咁叫人點Hold落去呢？BTW，就算今日指數可以上得到10線樓上收得到，但係喺日線圖上條「下降通道」呢？成個月啦喎，佢只會愈嚟愈硬淨，唔通真係靠下個星期一(10月9日)北水返嚟破佢位？
睇返五分鐘圖，再過多10分鐘後，指數暫時於17,517點/17,518點出咗「平頂」，其後升幅收窄，五分鐘圖上見10線已經升穿其他平均線衝緊上去，保歷加通道口仍然拓闊中，Slow STC(14,3)兩線即使上到超買，但暫時計似乎仲有出超買再超買嘅可能。
進取嘅，見指數喺五分鐘圖上踩得住10/20線嘅，恒指牛(54931)，收回價17,088點，同現價有約355點，槓桿有逾31倍，Day Trade only。安全嘅，如常用返五分鐘圖嘅Slow STC(14,3)等出Swing Trade啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
