【now.com財經】噚日無動作，不過指數喺日線圖中軸前廢廢地，諗住都係過唔到，但結果以噚日收市價19,252點計，指數算是重上保歷加中軸之上。
依家9點1分，恒指啱啱開始U盤，未正式開市之前睇咗個街貨圖先。經過噚日一朝早向上高衝啪咗第一層熊證街貨之後，今日見熊證最貼價層迫到上19,400至19,499點，噚日呢層都仲見到 有過千張期指街貨喺度，今日返嚟睇即縮走709張，得返470張期指街貨。重貨區見19,600至19,699點，但呢度講緊都只係得636張期指，同隔離左右比較，確實唔算特別多。
至於牛證方面，終於見到有新增街貨層出現，最貼價上到去18,900至18,999點。而18,500至18,599點雖然走咗有123張期指街貨，但仍然以1,139張期指街貨穩佔牛證重貨區。
依家9點27分，恒指完U後報出開市價19,227點，微跌24點。點數計指數仍然企於日線圖中軸之上，但由於開市點數變幅唔大，由五分鐘圖至小時圖嘅保歷加通道都好似平行時空咁，所以喺作戰室暫時都未有咩動作，都係等開市後指數風定啲先再算。
喺等緊指數比反應嘅時侯，睇緊隻滙控(00005)，係呀，早兩日喺YT上推輪時本來諗住推滙控同中移(00941)，但最後無拎到佢出嚟係因為怕怕地條友喺60蚊前又止步，有追開滙控嘅朋友都知對於隻象嚟講，60蚊同死線都無乜分別，今朝滙控開市報59.9元，同有四人個高位、大家都係喺60元附近都真係幾近，搞到個人心癢癢想開隻淡倉博佢五頂不破。
開個滙控熊嘅List嚟揀貨，一睇，嘿！公山小，你班友仔喺大約6%距離收熊證一早坐晒喺度，駛唔駛咁早呀，不過都仲有位入嘅，滙豐熊(52940)，收回價63.58元，同現價有近7%距離，槓桿有約11.25倍，雖然9月28日到期，但一來牛熊證受時間值影響比輪少好多，幾乎無咁滯；二來你都唔會揸到9月底啦。
終於等到10點，我最期待嘅畫面終於出現啦，滙控喺小時圖上高位見「射擊之星」呀！但同時都小心一下五分鐘圖有10線支持住佢一陣。安全嘅，用返五分鐘圖見Slow STC(14,3)處於高位時先至出淡倉，博行一趟Swing Trade先啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
