【Now財經台】受美國債務上限談判反反覆覆影響，道指5月埋單跌逾3%，終止兩個月升勢，不過，標指及納指連升3個月，其中，納指走勢十分強勁，5月累升近6%。
鴻鵠資產管理行政總裁陸庭龍指，道指係傳統股份，包括公共事業、大型龍頭企業等，喺全球經濟衰退陰霾下，歐洲及美國除咗就業市場、消費數據表現較好外，其他數據都呈下行趨勢，而內地過去1個月嘅經濟數據亦差過市場預期，喺全球化下，內地數據其實反映咗環球經濟嘅弱勢，即使美國就業、消費市場表現唔錯，都唔代表經濟活力係完全足夠。佢又話，債務上限問題解決後，預期市場會焦點放喺下半年經濟衰退嘅程度有幾深、會持續幾耐，以及聯儲局嘅減息空間。
