【now.com財經】上半場無揀過任何貨出嚟，不過喺作戰室就出咗淡倉，但係呢注淡倉都唔易做初段時間都要捱下指數無方向、飄飄下嗰種不確定走勢。
朝早同個老友兼高級分析師吹水，呢排大家都對個市無乜特別睇法，尤其是隻阿里(09988)一支箭飆咗上去之後，下一隻再搵都似乎未見有方向。
「有咩心水？」佢問
「無乜，阿里都被人起到咁」我答
「好難炒」佢接
「諗住4月(隨時過埋啲假期)先至再算」我回
講緊嘅係個股啫，業績期過去+有消息嘅都出晒嚟咁滯。而如果睇返恒指的話，如今朝所指，假設指數仍然處於「上升通道」中運行的話，「上升通道」頂線佢未到。今朝見指數有上過50天線，但由於高開低走嘅關係，所以指數喺半場再見已經縮返落去，無所謂嘅，「一浪高於一浪」的話，咁喺一個浪裡面都有浪升同浪跌，如果呢一刻上破唔到50天線嘅，就預計佢出現第二個浪嘅浪跌位剛剛開始，用返「上升通道」底線作為支持線計數，由今日呢粒燭向下垂直度落去，呢個位大約等於20,000點左右；當然，如果指數係「圓頂」式下行嘅，隨住「上升通道」底線都保持上行走勢之下，底線係會高於依家嘅20,000點水平。
用返以前嘅方式去量度的話，熊證今日先係被指數殺到上20,700至20,799點，而牛證今日未見有新貼牛上市，即最貼價層仍然都係20,000至20,099點，中間位即係20,399.5點。依家1點9分，指數做緊20,428點，升幅進一步收窄至119點，同呢個中間位只係話28.5點，唉~ 提早Happy Friday好過；我家老爺已經往球場方向出發睇七欖同做採訪，等我都搵定今朝邊個台有得睇先。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
