【Now財經台】美匯指數顯著反彈，最新企穩103水平。美國非農就業數據強勁，失業率更降至逾50年低位，市場再度擔心聯儲局再度轉鷹，由於市場對息口嘅預期不斷變化，導致外匯、商品及股票市場波動，本周焦點係本港時間周三，聯儲局主席鮑威爾發表講話，佢嘅講話對美元影響有幾大？
外匯分析師林銘添指，因為美國經濟出現收縮，即使聯儲局「放鷹」，市場仍覺得局方唔會有「鷹」派行動，預期3月加息後，局方就會停手，年底前甚至會掉頭減息。美國非農數據出爐後，市場隨即轉軚，估聯儲局仍會持續加息一段時間，甚至通脹會反彈，因此，即使美債收益率彈上去年12月水平，市場仍預期美元會保持強勢。
佢又話，相比鮑威爾嘅講話，市場更關注周四公布嘅新申領失業救濟人數會唔會反彈，並繼續尋找聯儲局嘅貨幣政策走向線索，林銘添又估計，美元短期走勢反復，有機會挑戰50天線，但要有更多靚數據，才可進一步推升美元。
