【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、中國恒大(03333)、港交所(00388)、藥明生物(02269)、碧桂園(02007)。
港交所股價中午收市挫近5%，特首出訪沙特阿拉伯，預期會簽到唔少協議，包括推動沙特阿美來港上市，但暫時未知爭唔爭取到，不過，市場預期，本港IPO市場會轉趨活躍，到底機會大唔大？
富昌證券聯席董事譚朗蔚指，港交所係大市替代品，有3個因素要留意，首先要判斷依家係牛市定熊市，暫時可視為喺升浪中調整，第2係成交，留意成交會唔會縮水，第3係IPO熱度，呢個係港交所其中一個重要指標，但現階段先當係利淡。
Stevan話，港交所係連續5日失守20天線嘅藍籌，早已跑輸大市，如果股價企得穩330元，可視為升浪調整，如果失守就要睇返310元，並建議唔好心急撈貨。
