【Now財經台】聯儲局主席鮑威爾暗示,可能再加息兩次美息便見頂,美匯指數應聲回落至101水平,跌至9個月低位。回顧今個加息周期,每當美匯指數係咁升,市場就會出現唔少「預言」,甚至美元崩潰論,真正風險其實出現未?美匯指數係咪已見底?
亨達集團助理總經理羅明立指,聯儲局似乎都認同通脹正在回落,但仍要加多一兩次息,又話今年減息唔係太合適,過去一段時間,市場一直憂慮美國經濟衰退,若年中經濟進一步轉弱,或要調整貨幣政策,佢認為呢個趨勢仍然未變,市場仍傾向睇淡美元,聽晚美國會出就業數據,如果勞工市場仍然良好,會限制美元短期跌幅,相反,美元將持續受壓。