【Now財經台】澳門中午出咗上個月嘅賭收數據，按年大增超過80％至逾110億澳門元，按月更飆逾2倍，遠勝預期。摩根士丹利上月估計，1月賭收僅62億澳門元，即使綜合市場預測，按年僅增長36％至約86億澳門元，結果為市場帶來驚喜，點解會出現呢個情況？
英皇證券研究部總監陳錦興指，雖然之前市場對賭收嘅預測較低，但農曆新年期間，有大行不斷跟進澳門消費及賭業嘅情況，其實最新估算已去到110億澳門元，依家出嚟嘅數字更好，反映澳門賭業復甦比市場預期強勁，賭收數據一出，賭股都應聲抽高。
佢又話，通關後，內地及香港人入境澳門唔使做核酸檢測，會進一步刺激旅客到訪澳門，利好當地旅遊及賭業，又認為賭業復甦情況有驚喜。
