【Now財經台】國際貨幣基金組織(IMF)上調今年全球及中國GDP增長預測,主要係中國突改變防疫政策及重新開放,同埋歐洲能源危機冇預期咁嚴峻等。不過,據《彭博》經濟研究指,中國經濟快速復甦,或會推高全球通脹,中國經濟復甦對全球嚟講,係咪一把「雙刄劍」?
永明資產管理首席投資策略師龔偉怡指,內地經濟重啟係今年投資市場亮點,而內地寬鬆嘅財政及貨幣政策亦值得留意,至於中國經濟復甦會唔會推高全球通脹,就要睇返係邊個經濟環節係復甦嘅主要推動力,由於歐美對中國出口嘅需求暫時都比較弱,因此,出口唔會係主力。
龔偉怡估計,中國唔會推出基建相關刺激方案,因此,大宗商品需求唔會出現爆發性增長,反而消費市道會係一個利好因素,總括而言,內地經濟復甦對全球通脹嘅影響相對溫和。