【Now財經台】港股近排升得幾急，雖然市場普遍睇好港股會繼續上，但唔少投資者都擔心高位回套壓力大，加上內地股市升勢相對慢，資金調配方面應該點部署？
思睿集團合夥人兼首席經濟學家洪灝指，如果港股回調，建議繼續趁低買貨，因為唔係睇每日行情，參考返周期嘅量化模型，中國經濟嘅短周期已經去到底部，並開始回暖，而回暖需時3至4年，第1年一般都係上升期，所以交易時，時間窗口最少以月計，如果執著於每日嘅升跌，會好影響投資者心態。
佢又話，如果睇水位，恒指會升到25000點水平，但恒指估值仍處於歷史低位，加上喺「兩會」前，大市處於數據真空期，完全靠資金驅動。洪灝又認為，內地舊年家庭存款較過去3年新增存款高80%，相信呢啲額外嘅存款，可以成為A股及港股上升動力。
