【Now財經台】被視為全球海運三大聯盟之一嘅「2M聯盟」將於2025年1月正式解散，聯盟由全球首兩大集裝箱航運公司地中海航運(MSC)及馬士基(Maersk)喺2015年成立，原本計劃合作最少10年，共享船舶及運力，有利管理成本。
滙豐證券指，即使2M聯盟於2年後解散，但現時或見影響浮現，該行指，今、明兩年期間有大量新船交付，同時供應過剩，航運公司為維持市場分額，定價方面會變得不規範，令行業明年面臨盈利下跌風險。
紅蟻資本投資總監李澤銘分析指，即使仲有2M聯盟，運費下跌趨勢已形成，因為隨疫情消退同內地復常，已經冇供不應求嘅情況。
瑞信睇好液貨船行業，本港上市嘅航運股中最睇好從事油品運輸嘅中遠海能(01138)。Alan補充，行業除咗受惠於俄烏戰事推動海上運輸石油、天然氣嘅需求，未來幾年又冇咩新運油船交付，預期運力供應穩定下，運費由冬天高位稍微回落後，今年仍會喺高位徘徊。
