【Now財經台】北水會喺下周一回歸,港股後市會繼續上衝,還是反高潮?滙豐金融服務(亞洲)投資策略主管劉紹文認為,北水較大機會開始獲利回套。
Kenny續指,北水喺舊年9月至10月趁港股回調大手掃貨, 到11月至12月港股開始反彈,北水就愈買愈少,甚至出現淨流出嘅情況。而呢啲聰明錢之前先買高beta值嘅新經濟股,並推高恒指,喺港股通暫停交易前開始買返舊經濟股,佢估計北水已經冇咩好炒。
Kenny又話,港股過去5年第1季均呈先高後低走勢,加上技術上已經超買,建議投資者今季唔使心急追貨,下方技術位留意19200點。
另一方面,外資近月積極北上加倉滬深股票,截至1月20日止,滬深股通今個月已錄得淨流入1125億人仔,創歷來單月新高,更超過舊年全年流入淨額。
不過,Kenny指出,南水數據以往對港股後市冇乜啟示性,僅反映外國基金現時想追入返舊年因睇淡內地經濟而拆咗嘅倉位。佢又提及,舊年5月至6月曾出現較大規模嘅「南水北調」,但呢個情況到7月已經完全消退。