【Now財經台】滙豐控股(00005)股價今年已累升近20%，唔少股民都睇實今年會唔會恢復派發季度息，不過，昔日長期係「紅底股」，兼有穩定派息嘅光景不再。
資深銀行家王浵世50年前正式加入滙豐銀行，見證呢間百年老店半世紀嘅變遷，佢認為，滙控業務曾遍布全球各地，甚至喺美國有龐大零售信貸業務，但因為業務太廣，令集團培訓通才時力不從心，加上近20年來集團將業務「功能化」，變成重視培養專才而忽略咗宏觀發展。
王浵世又提到，滙控喺2002年，即20年前，以當時嘅「天價」153億美元收購美國消費信貸公司Household International，並指呢項收購俾滙控管理層一個非常深刻嘅教訓。
當時喺滙豐美國工作嘅王浵世話，當時集團想藉收購拓展商業及私人銀行以外嘅零售銀行業務，但隨著經濟環境轉差，吸納返嚟嘅低端客戶帶嚟壞帳嘅機會大過其他客戶好多，於是衍生唔少後患。不過，佢又話，呢件事係滙控重整業務架構嘅轉捩點，現在業務範圍已大幅縮細，最近連加拿大零售銀行業務也出售。
