【Now財經台】聯儲局下周將會舉行2023年首次議息會議，市場估計，好大機會加息0.25厘，值得留意係，加拿大宣布加息之餘，亦預告會暫停加息，歐央行方面，官員放風話2月、3月加息0.5厘後，可能都要停一停，喺呢個情況下，美元係咪有機會反彈？
亨達集團助理總經理羅明立估計，環球央行今年會陸續放慢加息步伐，甚至停止加息，原因係今年經濟衰退風險相當高。美國方面，聯儲局官員早前仲係好口硬，雖然要繼續加息，但幅度可能會細啲，但拖長加，還是加埋今次就停，仲要睇多少少數據，同埋今次會議後嘅講法。Patrick又話，市場之前已經炒加息步伐放慢，美匯指數去到100、101水平其實已經差唔多，價格反映緊得七七八八，短線可能有反彈機會，但大幅反彈至103嘅機會唔大。
