【Now財經台】油價今個星期向下，紐約期油跌至1年低位後，略為回升至每桶73美元水平，油價年初一度衝上100美元水平，當時能源股亦跟升，值得留意係，雖然依家油價向下，但能源股指數仍然硬淨，點解油股同油價走勢會背馳？
馬山資本董事總經理林子傑指，油股同油價背馳情況，過去30年曾出現過5次，睇油股要留意公司盈利，近期油企公布嘅盈利都比舊年高2至3倍，另一方面，油價跌代表油企成本低咗，加上呢啲公司做回購，而唔少油股都係高息股，都對股價有支持。不過，Kevin指出，根據過往經驗，呢種背馳情況係會受時間差影響，所以兩者差距會慢慢收窄。
