【Now財經台】截至早上11時止，1小時內《彭博》用戶關注度上升最多港股，依次為小米集團(01810)、安踏體育(02020)、永利澳門(01128)、銀河娛樂(00027)、世茂集團(00813)。
安踏今日跑嬴大市，升幅仲勁過同業李寧(02331)及特步國際(01368)，快一步收復250天線，今朝一度高見99元，差少少就重返「紅底股」，似乎技術層面已經轉勢。基本面方面，內地有放鬆疫情防控制跡象，係咪會刺激安踏嘅銷情？瑞銀最新都唱好消費股，同埋推介李寧，揀股時李寧、安踏係咪可以秤先？
富昌證券聯席董事譚朗蔚指，市場憧憬內地持續復常，安踏呢類零售業龍頭係吸引到資金追入，又估計放寬防控政策嘅消息可以炒一陣，但追唔追入，就要睇股價短期可唔可以衝破100元。
Stevan又話，佢會傾向推介安踏，李寧之前因服裝設計風波捱沽，雖然之後反彈，但現價距離今年7、8月高位，仲有10元或約15%距離，相比之下，安踏已逼近「紅底」，反彈勢頭比較強。
