【Now財經台】吉利汽車(00175)擬分拆高端智能電動車業務極氪獨立上市，今日又公布上月極氪交付量按年飆逾4倍，達逾1.1萬架，係首次獨立出通告交待極氪銷售數字。
艾德金融聯席董事陳政深指，相對於上半年累計交付量近2萬架，極氪可以喺1個月內交付1萬架，反映交付量增速明顯加快，並追上其他新能源車品牌，佢認為極氪仍有增長空間。
Ryan續指，投資者可留意極氪嘅銷量及交付量係咪同步增長，因為其他「造車新勢力」有時會因供應鏈問題，未能如期交付汽車。
此外，吉利股價暫時3連升，累升逾22%，後市係咪可進一步挑戰高位？Ryan就話，依家吉利股價主要受市況影響，如果港股可以喺現水平橫行，吉利就有機會繼續升。
