【Now財經台】內地第三大城市廣州宣布多區解除臨時防疫管控,一直對內地退出清零政策持審慎態度嘅野村經濟師陸挺認為,今次係內地為未來數月邁向重新開放,踏出堅實嘅一步。市場對內地放寬防疫政策可以睇得樂觀啲嗎?
鴻鵠資產管理行政總裁兼首席投資總監陸庭龍指,過去兩個月跌得多嘅個股反彈特別快,例如京東集團(09618)、嗶哩嗶哩(09626)、阿里巴巴(09988),屬於追升股份,並非個別行業表現好或者有利好消息。今次調整管控措施,佢認為市場會睇好防疫政策逐步放鬆,尤其會期望下年三月「兩會」有好消息,令內地經濟重回正軌。
Alan話,推動股市攀升嘅原因,只是防疫措施放寬嘅消息傳出,部分資金為免錯過升市而重新追入,與實體經濟情況改善仲有距離。佢又話,餐飲、旅遊及零售行業短時間內未必會反彈,之前跌得多嘅股份,或者第一波受惠於防疫政策放寬嘅行業,股價先會有明顯升幅。