【Now財經台】中美喺高科技產業,尤其半導體業嘅「對壘」愈來愈明顯,不過,有分析指,如果中國要突破美國聯結台灣、日本及南韓嘅圍堵策略,反而可以專攻「上一代」晶片技術,或可殺出一條血路。
據《日經新聞》引述消息指,中芯國際(00981)去年開始,減少對先進嘅14至16納米產品投資,轉投研發技術較落後嘅28至39納米晶片。易方資本投資總監王華認同分析,指中國呢個做法係「冇辦法之中嘅辦法」,始終同美國硬碰硬冇咩優勢。
此外,帶領台積電發展成晶片龍頭嘅蔣尚義,去年離開中芯後,最新出任富士康母公司鴻海集團半導體策略長。王華預期,蔣尚義會領導鴻海發展芯粒(Chiplet)業務,毋須鬥製程技術,又可應用到集團旗下手機同汽車嘅代工業務。