【Now財經台】市場關注美國經濟明年係咪可以避過衰退或「軟著陸」，因為呢個因素會直接影響公司業績，應該傾向樂觀還是審慎？此外，今年不論亞洲、美國及歐洲都面對高通脹問題，央行要不斷加息遏通脹，展望明年，全球經濟、加息等步伐係咪好似今年咁一致？
安柏環球金融首席投資總監雷志海坦言，對美股明年表現審慎樂觀，主要有幾個因素，雖然美國利率會喺較高水平維持一段長時間，但如果企業財務穩健，加息唔會造成太大影響，其次係科技股及增長股今年已經調整咗唔少，明年有機會修正。
佢又話，今年全球除面對高通脹問題，強美元係另一個問題，若聯儲局明年調整加息步伐，美元自高位回落，將會對新興市場帶來正面影響。
