【now.com財經】今朝揀咗隻恒指牛(62784)出嚟，以指數上得到50小時線(小時圖50線))出動博再跳高視為入市訊號，再博指數見小時圖嘅保歷加頂線。
按今朝Patreon出文時間為9點58分，On top 比多10分鐘時間去睇文，即10點8分時再睇返走勢圖，其實指數已經上返50小時線之上，方便計數以10點10分至10點20分呢10分鐘作為(62784)買入時間，期內高低位做過0.096元/0.082元，平均買入價為0.089元。
落場後指數雖然未至於井噴式上行，但凌空沿住50分鐘線(五分鐘圖10線)而上，半日高位見過17,999點，上半場尾段時間稍稍向下穿過50分鐘線，而換個小時圖其實亦都見到喺11點至12點呢段時間，指數上到保歷加通道頂線，算是達到當初Set好嘅目標，按上半場最後10分鐘走貨作為(62784)上到小時圖保歷加通道頂線達標走貨可以，以11點50分至12點期間，(62784)高低位做過0.111元/0.106元計，平均賣出價為0.1085元，一計之下呢一趟平均賺幅有21.91%。
當然，如果係想等睇指數重上18,000點嘅，甚至今日借埋期結日打算高衝上去18,100至18,199點嘅熊證重貨區，沽半留半不反對，可以仍然以50分鐘線作為止蝕線。
到下半場開市之後，指數再出力一彈，升逾700點兼重上18,000點以上水平，再追好倉的確唔反對，但可能要轉身比上半場嘅快，或者都見小時圖指數仲頂住條保歷加通道頂線，仲有好倉嘅，就放膽一次追上重貨熊吧！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
