Now財經台】美國踏入感恩節後Black Friday嘅傳統消費旺季，隨著聖誕節愈嚟愈近，市場都會憧憬美股係咪會出現Santa Rally(聖誕老人升浪)，另一方面，近期市場焦點落喺聯儲局12月議息時，會唔會因應10月CPI及PPI增速放緩而放慢加息步伐，截至周三止，美股已連升兩個月，放慢加息步伐及通脹降溫憧憬，係咪12月出現Santa Rally嘅原因？
冠域商業及經濟研究中心主任關焯照指，相信美國通脹會持續改善，加上內地疫情升溫令油價下跌，美國CPI及PPI應該會穩定落嚟，而市場對息口走勢嘅預期，的確有利消費情緒。關博士又話，聯儲局內部預期美國經濟50%機會陷入衰退，而多項數據都顯示美國經濟將會陷入衰退，如果明年通脹可以持續放緩，加息步伐可以逐步放慢，不過，美國樓市已放緩咗幾個月，一旦出現跌市，甚至爆煲，一定對整體經濟構成影響。
