【Now財經台】內地短片平台快手(01024)噚日收市後出咗第3季業績,雖然業績繼續「見紅」,但虧損已大幅收窄,表現好過預期,雖然公司生意愈做愈大,盤數亦愈來愈靚,但股價一直冇起色,快手IPO價115元,上市初期一度炒上400元樓上,依家跌至50元左右,嚟緊股價會點走?幾時先可以上返水面?
華盛証券分析師聶振邦指,依家大行畀快手嘅目標價普遍係78元至88元,如果攞中位數就係83元,如果由現價約53元計,距離中位數有超過50%潛在升幅,不過,聶Sir話,要升到呢個水平,可能要等明年有業績配合,而今年餘下時間上望60至65元會比較合理,佢又認為,如果想重返「紅底股」,就要等集團成扭虧為盈,有一個較大嘅提振作用先有機會。