【Now財經台】領展房產基金(00823)今朝平開後，跌幅不斷擴大，跌超過3%，低見51.1元。
集團宣布發行33億元可轉換債券(CB)，年息率4.5厘，佔擴大發行基金單位數目約2.5%，轉換價為每基金61.92元，較噚日收市價有逾16%溢價。
集資用途冇咩特別，加上公司本身有20幾億元現金，槓桿比率得23%，發CB作再融資嘅財務效益未必太大，反而令市場擔心換股後出現攤薄效應，令股價今朝受壓。市場亦憂慮，領展嘅內地業務下半年會受內地疫情再升溫影響，因為上半年內地疫情影響已抵銷部分本港及海外市場復甦帶嚟嘅增長。
市場對內地放鬆防疫措施嘅憧憬落空後，領展股價反覆向下，今日更失守條50天線，要留意下方20天線，即約50元嘅支持位。
