【Now財經台】恒指公司會喺明日收市後公布季檢結果，中金估計嘅「染藍」大熱多達8隻股份，當中包括多次大熱倒灶嘅股份，到底邊啲股份有力「跑出」？
耀才證券研究部總監植耀輝估計，百勝中國(09987)機會最大，始終公司喺內地經營必勝客、KFC，屬於全國性業務，市值又高逾1700億元，成交量又偏高，再加公司月初公布嘅業績，表現唔錯，市場都收貨，尤其餐廳利潤持續增長，成本控制又做得好，反觀其他大熱新貴業績都麻麻。
雖然百勝依家仲持有美團(03690)逾400萬股，有機會受「公私合營2.0」影響而需要減持，因而影響股價，但Stanley指，百勝投資虧損嘅影響有限，因為公司淨利潤都有唔錯增長。
