【Now財經台】首程控股(00697)喺內地主營停車場嘅物業管理服務，華盛証券分析師聶振邦指，首程股價5月至今累升逾40%，對比恒指同期累跌超過10%，明顯跑贏大市。佢又話，首程派息穩定，息率約5厘，上半年喺內地疫情反覆期間，公司仍保持唔錯嘅盈利，依家市帳率(PB)約1倍，估值吸引。
早前，首程大股東首鋼集團完成出售部分股權予北京國有資本運營管理，2家公司都係國企，聶Sir認為，首程日後可能會有配合國家政策嘅動作，又話公司近年積極布局房託基金(REITs)投資，北京國管可能會轉讓旗下優質基礎建設資產畀首程管理，有助提升公司利潤率及加快盈利增長。
