【Now財經台】截至早上11時止，1小時內《彭博》用戶關注度上升最多港股，依次為康希諾生物(06185)、恒隆地產(00101)、聯想集團(00992)、吉利汽車(00175)及港交所(00388)。
康希諾打入港股升幅榜榜首，今朝高開3%後，最多飆逾60%，高見138.6元，其後升幅略為收窄，半日升51%，報130.4元。
股份除咗炒上日內地研究開關消息，今朝公司又公布旗下吸入用新冠疫苗開始喺內地江蘇13個城市應用，令市場憧憬新冠藥常態化後，內地可以逐漸「復常」。
不過，獨立股評人譚智樂分析指，雖然康希諾股價升穿250天線，但股份已經第6日喺大成交下向上，又冇業績配合，預期股價欠缺動力重上以前高位，並認為投資者未有貨，但想高追係慢咗幾拍，風險非常高。
Arnold表示，康希諾嘅基本因素存在好大變數，之前靠疫苗賺到嘅盈利水平不足以支持目前估值，公司現金流或會隨研發活動增加出現一定壓力，並提到公司有可能趁股價被夾高後進行融資活動。
