【Now財經台】主要從事鮮活食品代理、貿易，及提供屠宰服務嘅廣南集團(01203)，今日低開逾1.7%後，持續受壓，但中午發盈喜後，午後一度倒升逾5%，高見0.61元，收市報0.59元，升逾1.7%。
集團預期，今年首3季較舊年同期多賺1.3倍，以去年首3季賺5310萬元計，今年首3季賺約1.2億元，已經多過公司舊年全年賺嘅錢。公司解釋，係因為實施一系列發展戰略後，經營表現大幅提升。
不過，廣南業務前景唔係冇隱憂，公司喺上半年業績中提到，內地活豬價格反彈，加上屠宰量上升，形成新嘅利潤增長點，但如果豬肉價格繼續升，唔排除國家發改委會再出手撳低豬肉價格，令公司維持唔到增長。
雖然廣南今日發盈喜，但獲利盤同時湧現，股價去到10天線，即0.582元前就行人止步，股價今日一度上返2020年疫情後嘅橫行區間，但後來跌返落去，要留意公司出咗季績後，可唔可以帶動股價再上返橫行區。
