【Now財經台】早前，美國晶片企業AMD發盈警，加上美國宣布進一步收緊對華芯片出口限制，即時震散芯片相關股。據外電報道，美國芯片供應商KLA今日起停止向中國客戶提供部分產品及服務，以遵守美國嘅規定，在港上市嘅晶片股普遍向好，華虹半導體(01347)一度大升逾14%，但中芯國際(00981)喺大成交下受壓，一度挫逾5.4%，過往有呢啲壞消息傳出，投資者好多時會當好消息炒，例如會借「芯片自強」呢啲概念買返上去，依家呢啲諗法仲用唔用得著？
華盛証券分析師聶振邦指，在經濟疲弱嘅大環境下，依賴本土消耗產品可能會有產能過剩風險，美國有半導體企業下調盈利指引，主要因應美國經濟衰退壓力，中國都有類似情況，因為受清零政策影響，晶片企業短期都出現產能過剩情況。
至於華虹股價，聶Sir就話，雖然集團盈利基礎強勢，但股價未能配合，以現價計估值係吸引，所以會有資金追捧，亦係今日股價大升嘅原因，但由於營商環境仍有不確定，呢方面都要留意。
