【Now財經台】汽車板塊近期弱勢，理想汽車(02015)今朝重挫逾10%，小鵬汽車(09868)又創第二上市新低，吉利汽車(00175)資金噚日繼續流入淡倉，投資者應該等跌到低位博反彈，還是繼續睇淡？
瑞萬通博香港上市產品銷售部董事葉文炘指，對吉利資金淨流入淡倉有啲意外，反映投資者都睇得幾淡，因為同樣係車股嘅比亞迪股份(01211)，都有少量資金流入好倉博反彈。佢提醒，如果係揀吉利熊證嘅投資者，可以留意收回價喺9.5元水平，牛證方面，同現價距離約10%都有投資者留意。此外，車股股價向下之際，期權巿場嘅引伸波幅係向上，投資者開倉時要諗下揀牛熊證還是輪。
